Bu gün Azərbaycan Respublikasının ictimai asayişinin qorunmasında, vətəndaşların təhlükəsizliyinin təmin edilməsində, daxili sabitliyin möhkəmləndirilməsində misilsiz xidmətləri olan Daxili İşlər Naziri, polis general-polkovnik Vilayət Süleyman oğlu Eyvazovun doğum günüdür. Bu əlamətdar gün münasibətilə onu ürəkdən təbrik edir, cansağlığı, dövlətə və xalqa xidmət missiyasında yeni-yeni uğurlar arzulayırıq.

Vilayət Eyvazov Azərbaycanın hüquq-mühafizə orqanları sistemində yüksək peşəkarlığı, prinsipial mövqeyi, dövlətə və dövlətçiliyə sədaqəti ilə tanınan bir şəxsiyyətdir. Onun rəhbərliyi dövründə Daxili İşlər Nazirliyi müasir dövrün çağırışlarına uyğun şəkildə yenilənmiş, struktur islahatları aparılmış, polis orqanlarının peşəkarlığı və vətəndaşlara xidmət səviyyəsi yüksəldilmişdir. Nazir kimi fəaliyyəti dövründə Vilayət Eyvazov qanunun aliliyinin, ədalətin və vətəndaş məmnunluğunun təmin olunmasını daim ön planda saxlamışdır.

Əslən Naxçıvan MR-in Şərur rayonundan olan Vilayət Eyvazov hüquq sahəsində aldığı dərin bilikləri və zəngin təcrübəni əməli fəaliyyətində uğurla tətbiq etmiş, ölkənin hüquq-mühafizə sistemində etibarlı, qətiyyətli və vicdanlı məmur obrazı formalaşdırmışdır. O, hüquq-mühafizə orqanlarında bir çox məsul vəzifələrdə çalışmış, zamanın və şəraitin çətinliklərinə baxmayaraq vətənə xidmət prinsipindən bir addım belə geri çəkilməmişdir.

Xüsusilə qeyd etmək lazımdır ki, Vilayət Eyvazov həm də Vətən müharibəsi dövründə Daxili İşlər Nazirliyinin şəxsi heyətinə rəhbərlik edərək, onların döyüş ruhunun, intizamının və hazırlığının yüksək səviyyədə təmin olunmasında xüsusi rol oynamışdır. O günlərdə Daxili Qoşunlar və polis əməkdaşları ərazi bütövlüyümüz uğrunda mübarizədə misilsiz qəhrəmanlıq nümunələri göstərmişlər. Bu prosesdə Nazirin sərəncam və göstərişləri, vətənpərvərlik ruhunda çağırışları önəmli rol oynamışdır.

Vilayət Eyvazov sadəcə vəzifə borcunu yerinə yetirən bir dövlət məmuru deyil, həm də humanist, qayğıkeş və ədalətli rəhbərdir. O, şəhid ailələrinə, qazilərə, sosial həssas təbəqədən olan insanlara daim diqqət və qayğı ilə yanaşır. Daxili İşlər Nazirliyinin sosial layihələri, şəxsi heyətin mənzil-məişət şəraitinin yaxşılaşdırılması istiqamətində atılan addımlar onun insani və vətənpərvər keyfiyyətlərinin bariz göstəricisidir.

Eyni zamanda, Vilayət Eyvazovun rəhbərliyi ilə nazirlik strukturunda şəffaflıq, hesabatlılıq və məsuliyyət hissi daha da gücləndirilmiş, gənc kadrlara dəstək göstərilmiş, müasir texnologiyaların tətbiqi ilə polis xidmətlərinin səmərəliliyi artırılmışdır. Onun təşəbbüsü ilə vətəndaş məmnunluğuna yönəlmiş islahatlar geniş vüsət almışdır.

Bu gün cəmiyyətin bütün təbəqələri, xüsusilə hüquq-mühafizə orqanlarında çalışan əməkdaşlar Vilayət Eyvazovun xidmətlərini yüksək qiymətləndirir. Onun səmimi münasibəti, ciddi idarəçilik bacarığı və dövlətə sədaqəti nümunə göstərilir. Hər bir polis əməkdaşı onun rəhbərliyi altında fəxrlə xidmət edir, çünki bilirlər ki, onların arxasında ədalətli və güclü bir rəhbər dayanır.

Bu əlamətdar gündə – Vilayət Eyvazovun doğum günündə ona möhkəm can sağlığı, uzun ömür, ailə səadəti və məsuliyyətli fəaliyyətində yeni nailiyyətlər arzulayırıq. Azərbaycanın daxili sabitliyinin təminatçısı olan bu vətənpərvər şəxsiyyətin uğurlu fəaliyyəti hər zaman xalqımızın rifahına, dövlətimizin qüdrətlənməsinə xidmət edir.

TƏBRİK EDİRİK, cənab general-polkovnik Vilayət Eyvazov!

Sizə möhkəm iradə, ali dövlətçilik mövqeyi və vətəndaşlara olan məsuliyyət hissinizlə daha uzun illər Azərbaycan xalqına xidmət etməyi diləyirik!