Milli Qəhrəmanın ailəsinə qarşı ədalətsizlik: Torpaq əlindən alınıb?

Azərbaycan Respublikasının müstəqilliyi, azadlığı və ərazi bütövlüyü uğrunda canını fəda etmiş şəhidlər, xüsusilə də Milli Qəhrəmanlarımız bizim üçün müqəddəsdir. Onların ailələrinə göstərilən diqqət və qayğı dövlət siyasətinin əsas prioritetlərindən biri olub. Lakin bəzi hallarda bu prinsiplər yerli icra hakimiyyəti orqanlarının fəaliyyətsizliyi və ya özbaşınalığı nəticəsində kobud şəkildə pozulur. Bu gün belə acı nümunələrdən biri ilə qarşılaşırıq – söhbət Milli Qəhrəmanın oğlu Xaliq Fərzəliyevin üzləşdiyi ədalətsizlikdən gedir.

Xaliq Fərzəliyev mətbuata və ictimaiyyətə müraciət edərək bildirib ki, mərhum şəhid atasına – Azərbaycanın Milli Qəhrəmanına – vaxtilə Ulu Öndər Heydər Əliyevin şəxsi təşəbbüsü və göstərişi ilə verilmiş 10 hektar torpaq sahəsi hazırda onun əlindən alınıb. Ən dəhşətlisi isə budur ki, bu prosesin arxasında Füzuli Rayon İcra Hakimiyyətinin başçısı Alı Alıyev, “Azərşəkər” MMC və Beyləqan rayonu üzrə 1 saylı xüsusi notarius Cəsarət Qasımovun olduğu iddia edilir. Əgər bu iddialar həqiqəti əks etdirirsə, bu, sadəcə vətəndaşın deyil, bir şəhid ailəsinin hüquqlarının pozulması deməkdir – özü də dövlətin ali dəyərlərini təmsil edən bir ailənin.

Xaliq Fərzəliyev həmçinin qeyd edir ki, məsələ ilə bağlı sosial şəbəkələrdə fikirlərini bölüşdükdən sonra Füzuli RİH-in hüquq şöbəsinin müdiri Rahib Bağırov tərəfindən təhqir olunub. Onun sözlərinə görə, Bağırov TikTok platformasında yazdığı rəy və şərhlərlə Milli Qəhrəmanın ailəsini alçaldıcı ifadələrlə hədəf alıb. Daha sonra bu rəyləri silməsi isə, iddiaya görə, məsuliyyətdən yayınmaq cəhdidir.

Əgər vətəndaşın şikayəti və təqdim etdiyi sübutlar doğru və hüquq-mühafizə orqanları tərəfindən təsdiqlənərsə, bu hadisə Azərbaycan cəmiyyətində böyük narazılığa və haqlı etiraza səbəb olacaq. Çünki bu hadisə təkcə bir vətəndaşın yox, bütövlükdə bir şəhid ailəsinin, üstəlik, bir Milli Qəhrəmanın xatirəsinin tapdanması kimi qiymətləndirilməlidir.

Sual yaranır: necə olur ki, şəhidin ailəsinə verilən rəsmi torpaq sahəsi bir neçə qurumun iştirakı ilə əlindən alına bilir? Notarius hansı əsasla bu əməliyyatı təsdiqləyib? “Azərşəkər” MMC-nin bu işdə hansı maraqları olub və nəyə əsaslanaraq torpağa sahib çıxıb? Füzuli rayon rəhbərliyinin bu prosesdə rolu nədən ibarətdir? Bu suallar cavabsız qaldıqca, məsələ ətrafında şübhələr artır.

Bu hadisə ölkəmizdə şəhid ailələrinə qarşı bəzi hallarda həyata keçirilən ikili standartları bir daha gündəmə gətirir. Prezident İlham Əliyev və Birinci Vitse-Prezident Mehriban xanım Əliyeva şəhid ailələrinə hər zaman xüsusi diqqət və qayğı göstərir, onların rifah halının yaxşılaşdırılması üçün saysız-hesabsız layihələr həyata keçirilir. Lakin bəzi yerli məmurlar bu yüksək siyasətə zidd olaraq, şəxsi maraqları naminə belə ailələrə zülm etməyə qədər gedə bilirlərsə, bu, artıq təhlükəli tendensiyanın göstəricisidir.

Xaliq Fərzəliyevin çıxışlarında səsləndirdiyi tələblər sadə və qanunidır: O, atasının adını, onun şəhidliyini və ailəsinin hüquqlarını qorumağa çalışır. O, Azərbaycan Respublikasının qanunlarına güvənir, ölkə rəhbərliyinə müraciət edir və ədalət istəyir. Bu isə hər bir Azərbaycan vətəndaşının fundamental haqqıdır.

Ədalət prinsipləri yalnız paytaxtda və ya böyük şəhərlərdə deyil, ölkənin hər bölgəsində, hər kəndində, hər ailəsində qorunmalıdır. Əgər bir Milli Qəhrəmanın övladı belə haqsızlığa məruz qalırsa və səsinin eşidilməsi üçün Prezidentə müraciət etməyə məcbur qalırsa, bu, yerli icra strukturlarının fəaliyyətində ciddi nöqsanların olduğunu göstərir.

Bu məsələ dərhal və obyektiv şəkildə araşdırılmalıdır. Xaliq Fərzəliyevin təqdim etdiyi sübutlar, sosial şəbəkələrdə yazılmış və sonradan silinmiş rəylər, torpaqla bağlı sənədlər və notarial təsdiqlər hüquq-mühafizə orqanları tərəfindən araşdırılmalı, lazım gəldikdə məsul şəxslər cəzalandırılmalıdır. Əks halda, bu tip halların təkrarlanması və şəhid ailələrinin hüquqlarının pozulması davam edə bilər.

Cəmiyyətimizin əsas dayaqlarından biri şəhidlərə və onların ailələrinə olan münasibətdir. Biz bu dayaqları sarsıtmağa icazə verə bilmərik. Xaliq Fərzəliyevin səsi – təkcə bir övladın deyil, həm də dövlətimizin və xalqımızın müqəddəs dəyərlərinin səsidir. Bu səsə biganə qalmaq olmaz. Əgər bir şəhidin ruhuna və onun ailəsinin haqqına toxunulursa, bu artıq təkcə hüquqi deyil, mənəvi məsuliyyət məsələsidir.

Sonda isə bu çağırışı təkrarlamaq lazımdır: Hörmətli Prezident İlham Əliyev və Birinci Vitse-Prezident Mehriban xanım Əliyeva – bir Milli Qəhrəmanın ailəsinin səsi sizə media vasitəsi ilə çatdırmaq istəyir. Onlar sizə güvənir. Bu ədalətsizliyin qarşısının alınması üçün göstəriş verməyiniz cəmiyyətə və bütün şəhid ailələrinə verilən güclü bir mesaj olacaq: Dövlət onları heç zaman tək buraxmır.

Adıçəkilənlərin mövqeyini tanıyırıq.

Heqiqixeber.az