Xətai rayonunda qanunsuz tikinti ilə bağlı şikayət

Fim.az-a daxil olan şikayətdə bildirilir ki, şikayətçi müharibə iştirakçısıdır və himayəsində birinci qrup əlil qardaşı var. O, ailəsi ilə birlikdə Xətai rayonu, Məhəmməd Hadi küçəsi ev 2944, mənzil 269 ünvanında yaşayır.

Şikayətçinin sözlərinə görə, alt qonşusu qanunsuz olaraq eyvanının qarşısında 40 kvadratmetrlik əlavə tikinti aparıb. Bu isə həm eyvandan mənzərənin bağlanmasına, həm də antisanitar vəziyyətin yaranmasına səbəb olub. Həmçinin, sözügedən tikinti heç bir normativ qaydalara cavab vermir və gələcəkdə yanğın təhlükəsi yarada bilər.

Məsələ ilə bağlı qonşusuna irad bildirilsə də, həmin şəxs özünü hüquqşünas kimi təqdim edərək, “iki institut bitirmişəm, qanunları yaxşı bilirəm” deyərək tikintiyə davam edib.

Şikayətçi bildirib ki, bu barədə dəfələrlə Xətai Rayon İcra Hakimiyyətinə, Fövqəladə Hallar Nazirliyinə və Şəhərsalma və Memarlıq Komitəsinə müraciət olunmasına baxmayaraq, heç bir nəticə əldə edilməyib.

Bundan əlavə, qonşu şikayətçinin eyvanı qarşısına icazəsiz kamera quraşdırıb. İrad bildirildikdə isə, o, şikayətçinin ailəsini ittiham edərək 36-cı Polis Bölməsinə müraciət edib. Nəticədə 04.08.2025-ci il tarixində şikayətçinin həyat yoldaşı Abbasova Sevinc Əli qızı və qızı Abbaszadə Aysel Azər qızı polis bölməsinə aparılıb.

Şikayətçi isə bildirir ki, sanki qanunsuz tikinti aparan özü deyil, məhz onlar günahkar kimi təqdim olunurlar.

Ailəsi adından müraciət edən müharibə iştirakçısı ictimaiyyət və aidiyyəti qurumları bu məsələyə biganə qalmamağa, yaranmış haqsızlığa son qoymağa çağırır.
Qarşı tərəfin mövqeyini dərc etməyə hazırıq.