Etikanın və hüququn tapdanması: “Doktor” Gülbədə Abdullayeva məsələsində susqunluq niyə davam edir?

“Əməliyyat otağında etika yox, reytinq axtarışı”

Son günlər sosial şəbəkələrdə yayılan görüntülər cəmiyyətdə böyük narahatlıq yaradıb. Özünü “doktor Gülü Abdullayeva” kimi təqdim edən Gülbədə Abdullayeva tərəfindən paylaşılan videolar pasient hüquqlarının açıq-aşkar pozulmasını göstərir. Daha dəhşətlisi odur ki, bu videolarda pasient narkoz altında olarkən lüt vəziyyətdə çəkilir və mobil telefona köçürülür. Əməliyyat otağı adlanan mühit, etik və peşə standartlarına uyğun bir məkan olmaq əvəzinə, sosial şəbəkə üçün “kontent” hazırlanan bir platformaya çevrilib.

Həkim peşəsi cəmiyyətin ən həssas sahələrindən biridir. Hippokrat andı yalnız söz deyil, mənəvi və hüquqi öhdəlikdir. Pasientin həyatı, sağlamlığı və ləyaqəti hər bir tibbi prosedurda qorunmalıdır. Əgər bir həkim bu prinsipləri kobud şəkildə pozursa, onun həkim adını daşımağa haqqı yoxdur. Gülü Abdullayeva tərəfindən paylaşılmış görüntülər isə birbaşa bu etik normaların pozulmasını göstərir. Əməliyyat otağında pasienti məxsərəyə qoymaq, narkoz altında olan şəxsi lüt şəkildə çəkmək və paylaşmaq yalnız cəmiyyəti şok etmir, həm də qanun qarşısında məsuliyyət doğurur.

Cəmiyyətin haqlı sualı budur: Aidiyyatı orqanlar niyə tədbir görmür? Niyə belə açıq-aşkar hüquq pozuntusuna göz yumulur? Bu cür halların cəzasız qalması yalnız həmin şəxsin deyil, bütün sistemin etibarına zərbə vurur. Əgər Gülü Abdullayeva kimsə tərəfindən himayə olunursa, bu, dövlətin qanun qarşısında bərabərliyi prinsiplərinə ciddi təhdid yaradır. Qanun hər kəs üçün bərabər olmalıdır – istər adi vətəndaş, istərsə də sosial mediada məşhurlaşmış “doktor”.

Məsələnin ictimai əhəmiyyəti böyükdür. Belə qeyri-etik davranışların cəzasız qalması gələcəkdə oxşar halların artmasına şərait yaradır. İnsanlar görür ki, hüquq pozuntusu edən şəxs cəzasız qalırsa, bu, ictimaiyyətin dövlət orqanlarına inamını zəiflədər. Tibbi peşənin nüfuzunun qorunması üçün hər bir həkim peşə və etik standartlara əməl etməli, pasientin hüquqlarını qorumaq öhdəliyini yerinə yetirməlidir.

Həm hüquqi, həm də mənəvi baxımdan, Gülü Abdullayeva məsələsində dərhal tədbir görülməlidir. Tibbi ictimaiyyət, media və hüquq müdafiəçiləri bu hadisəni diqqətdə saxlamalı, aidiyyatı orqanlardan qanuni tədbirin görülməsini tələb etməlidirlər. Əks halda, cəmiyyətin gözündə tibb peşəsi yalnız “kontent” və sosial şəbəkə maraqlarına xidmət edən bir sahəyə çevrilmiş olur.

Azərbaycan səhiyyəsi son illər Prezident İlham Əliyevin rəhbərliyi ilə şəffaflıq, pasient məmnuniyyəti və etik dəyərlər üzərində qurulur. Belə bir mühitdə Gülü Abdullayeva kimi şəxslərin fəaliyyəti yalnız dövlət siyasətinə, həm də həkim peşəsinin nüfuzuna kölgə salır. Pasientin ləyaqəti toxunulmazdır və hər bir həkim bunun qoruyucusu olmalıdır. Əks təqdirdə, o, cəmiyyətin gözündə həkim yox, təhlükə mənbəyinə çevrilir.

Hər bir vətəndaş, xüsusilə tibbi sahədə çalışan peşəkarlar, bu cür hallara qarşı səsini qaldırmalıdır. Gülü Abdullayeva məsələsi yalnız fərdi məsələ deyil, ictimai dəyərlərin, etik və hüquqi standartların qorunması məsələsidir. Aidiyyatı orqanların dərhal tədbir görməsi və məsul şəxsin qanun qarşısında cavab verməsi labüddür. Çünki cəzasızlıq – ən böyük cinayətdir.Mövzu diqqətimizdədir. 

Qarşı tərəfin mövqeyini tanıyırıq.

Heqiqixeber.az