Son vaxtlar restoran və iaşə obyektlərində şəffaflıq və dürüstlük məsələsi daha çox müzakirə olunur. Təəssüf ki, bəzi müəssisələr hələ də müştərilərin etibarını sarsıdan addımlar atmaqda davam edir. Redaksiyamıza daxil olan məlumata görə, “Sushi Əcəmi” restoranında baş verən qiymət və xidmət fırıldağı buna daha bir bariz nümunədir.

Belə ki, vətəndaş suşi sifarişi zamanı menyuda göstərilən qiymətə əsasən ödəniş etməyə hazırlaşsa da, çatdırılma zamanı tamamilə fərqli məbləğlə qarşılaşıb. Müştərinin iddiasına görə, sifariş əsnasında heç bir əlavə xərc barədə məlumat verilməyib, qiymət fərqi isə yalnız qapıda məlum olub. Bu isə həm istehlakçı hüquqlarının kobud şəkildə pozulması, həm də etik olmayan kommersiya davranışının göstəricisidir.

Məsələ bununla da bitmir. Sifarişçi bildirir ki, restoran 100 suşi göndərməli olduğu halda, qutunu açarkən cəmi 80 suşi ilə qarşılaşıb. Yəni müştəri həm qiymət baxımından, həm də məhsulun miqdarı baxımından aldadılıb. Bu cür hallar artıq təsadüfi texniki səhv deyil, sistemli şəkildə aparılan qeyri-şəffaf fəaliyyət təsiri bağışlayır. Əlavə ödəniş tələb edib məhsulun miqdarını azaltmaq isə açıq-aşkar fırıldaq kimi qiymətləndirilməlidir.

Hər hansı iaşə obyektinin əsas məqsədi müştəri qazanmaq və uzunmüddətli etimad yaratmaqdır. Lakin “Sushi Əcəmi”nin bu kimi addımları həm öz imicinə zərər vurur, həm də ümumilikdə restoran sektoruna olan güvəni azaldır. Qiymətlərin sifariş zamanı bir cür, çatdırılmada başqa cür təklif olunması, üstəlik, vəd edilən məhsulun natamam şəkildə göndərilməsi müştərilərin haqlı narazılığını artırır.

Hesab edirik ki, məsul qurumlar tərəfindən bu kimi hallara ciddi nəzarət edilməli, obyektlər isə qiymət və xidmət siyasətində tam şəffaflıq təmin etməlidir. Müştəri aldadılmasına yönəlmiş hər bir addım qanunvericilik çərçivəsində araşdırılmalı, zəruri tədbirlər görülməlidir.

“Sushi Əcəmi” rəhbərliyi isə tezliklə məsələ ilə bağlı izahat verməli, qiymət fərqlərinin və məhsul çatışmazlığının səbəbini açıqlamalı, iş prosesində şəffaflığı bərpa etməlidir. Müştərinin etibarı hər şeydən önəmlidir – onu itirmək asan, qazanmaq isə çətindir.

Qarşı tərəfin mövqeyini tanıyırıq.