Vətən müharibəsi iştirakçısının medalı təqdim olunub

Tərtər rayonunun Qaraağacı kənd sakini, Vətən müharibəsi  iştirakçısı Abdullayev İsmət Həmid oğlu Azərbaycan Respublikası Prezidentinin 18 dekabr 2020-ci il tarixli Sərəncamı ilə  “Cəsur döyüşçü” medalı ilə təltif olunub.
Bu münasibət ilə İsmət Abdullayev rayon icra hakimiyyətinə dəvət olunub. Rayon icra hakimiyyətinin  başçısı Müstəqim Məmmədov Səfərbərlik və Hərbi Xidmətə Çağırış üzrə dövlət xidmətinin Tərtər rayon şöbəsinin rəis müavini Ramil Qarayev və İctima Nəzarət Tərtər Rayon Şöbəsinin sədri Nəcmiyyə Zeynalzadə ilə birlikdə Vətən müharibəsi  iştirakçısı qəbul edib.
Rayon rəhbəri İsmət Abdullayevi Vətən müharibəsində göstərdiyi sücaətə görə  Ali Baş Komandan tərəfindən “Cəsur döyüşçü” medalla təltif edilməsi münasibəti ilə təbrik edərək medalı sahibinə təqdim edib.
İsmət Abdullayev Vətən müharibəsində, torpaqlarımızın  işğaldan azad edilməsində iştirak etməsindən qurur duyduğunu bildirib, şəhid ailəsi və qazilərə göstərilən diqqət və qayğıya görə Ali Baş Komandana öz minnətdarlığını bildirib.

Vətən müharibəsi Şəhidinin ad günü qeyd edildi

Bu münasibətlə Tərtər Rayon İcra Hakimiyyətinin, SHXÇDX-nin Tərtər rayon şöbəsinin, veteranlar təşkilatlarının nümayəndələri, qazilər və şəhidin yaxınları şəhidin məzarını ziyarət edərək önünə gül dəstələri düzüb, ruhuna dualar oxuyublar. Sonra şəhidin yaşadığı evə gedərək ailəsinin qayğıları ilə maraqlanıblar.
Əzizov Ayşad Qaryağdı oğlu 05 sentyabr 1990-cı ildə Tərtər rayonunun Əskipara kəndində anadan olub. Azərbaycan Ordusunun müddətdən artıq həqiqi hərbi xidmət qulluqçusu olan Ayşad 2020-ci il sentyabrın 27-dən Azərbaycan Silahlı Qüvvələri tərəfindən Ermənistan işğalı altında olan ərazilərin azad edilməsi üçün başlanan Vətən müharibəsində iştirak edib. Sentyabrın 27-də Talış kəndi istiqamətində gedən döyüşlərdə qəhrəmancasına şəhid olub.
Azərbaycan Respublikasının Prezidenti cənab İlham Əliyevin müvafiq Sərəncamları ilə ölümündən sonra "Vətən uğrunda" və “Suqovuşanın azad olunmasına görə” medalları ilə təltif edilib.
Allah şəhidlərimizə rəhmət eləsin, ruhları şad olsun!








Tərtər rayonunda KOB dostu fəaliyyətə başlayıb

Qarabağ iqtisadi rayonu üzrə sayca ikinci Kiçik və Orta Biznesin Dostu (KOB dostu) Tərtər rayonunda fəaliyyətə başlayıb. Tərtər Gənclər Mərkəzində fəaliyyət göstərəcək KOB dostu müvafiq rayonla yanaşı, ətraf şəhər və rayonların sahibkarlarına da biznes sahəsində dəstək və xidmətlər göstərəcək.
Sentyabrın 3-də Kiçik və Orta Biznesin İnkişafı Agentliyinin (KOBİA) təşkilatçılığı, Tərtər Rayon İcra Hakimiyyətinin, sahibkarların və onlara xidmət göstərən müvafiq qurumların nümayəndələrinin iştirakı ilə KOB dostu rayonun biznes ictimaiyyətinə təqdim edilib, iştirakçılar KOB dostu ofisində sahibkarlar üçün yaradılmış şəraitlə tanış olublar.
KOBİA-nın İdarə Heyətinin sədri Orxan Məmmədov KOB dostu mexanizmi və Agentliyin digər dəstək və xidmətləri barədə sahibkarlara məlumat verib, onları KOB dostu ilə fəal əməkdaşlığa dəvət edib. Vurğulanıb ki, KOB dostu Tərtər rayonunda sahibkarlıq fəaliyyətinin inkişafı, yeni biznes subyektlərinin yaradılması, sahibkarların maraqlarının müdafiəsi və s. kimi istiqamətlərdə dəstək və xidmətləri yerində göstərəcək. Bununla yanaşı, KOB dostu lazım gəldikdə sahibkarları müvafiq qurumlarla əlaqəndirəcək, onların qarşılaşdıqları çətinliklərin həlli istiqamətində dövlət-sahibkar əməkdaşlığı platforması çərçivəsində müvafiq tədbirlər görəcəkdir. 
Orxan Məmmədov onu da qeyd edib ki, 44 günlük Vətən müharibəsi zamanı döyüş bölgəsindən kənarda yerləşən bir sıra şəhər və kəndlərimiz kimi Tərtər rayonu da Ermənistanın təxribatlarından ziyan çəkmişdir. Dağıntılara və itkilərə baxmayaraq, Tərtər sakinləri böyük əzm nümayiş etdirmişdir. Artıq Vətən müharibəsi zamanı əmlaklarına ziyan dəymiş vətəndaşlara və sahibkarlıq subyektlərinə maddi yardımların ödənilməsinə başlanılmışdır. 
Tərtər Rayon İcra Hakimiyyətinin başçısı Müstəqim Məmmədov özəl sektorun inkişafı istiqamətində rayonda həyata keçirilən tədbirləri diqqətə çatdırıb, digər dövlət dəstəyi mexanizmləri kimi, KOB dostunun da sahibkarlıq fəaliyyətinin genişlənməsi və biznesə yeni başlayanlar üçün əhəmiyyətli olacağını vurğulayıb.
Tədbir çərçivəsində KOBİA-nın sahibkarlara göstərdiyi dəstək və xidmətlər, KOB dostu mexanizmi ilə bağlı filmlər nümayiş olunub, sahibkarların sualları cavablandırılıb.
Qeyd edək ki, hazırda KOBİA-nın ölkənin 26 şəhər və rayonunda 31 KOB dostu fəaliyyət göstərir. 
Tədbirdən sonra KOBİA-nın nümayəndələri Tərtər rayonunda fəaliyyət göstərən bir sıra istehsal müəssisələri və fermer təsərrüfatları ilə tanış olub, sahibkarlarla görüşüblər.

İcra başçısı Şəhid ailələrini qəbul etdi

Tərtər Rayon İcra Hakimiyyətinin başçısı Müstəqim Məmmədov sentyabr ayının 1-də rayonun Hüsənli kəndindən olan şəhid Mehralı   Əliyevin və Qaradağlı kəndindən olan şəhid Sərdar Ələkbərovun ailə üzvlərini qəbul edib, onların problemləri, qayğıları ilə maraqlanıb və müraciətlərini dinləyib. Hüsənli kənd sakini, şəhid övladı Qənimətli Elman ev növbəsi, şəhid oğlu Qaradağlı kənd sakini Ələkbərov Ruslan isə məşğulluq problemi ilə bağlı müraciət ediblər.
Qənimətli Elman Mehralı oğluna anası Həsənova Raziyyə Həbib qızının ev növbəsinə götürülməsi ilə bağlı  məlumat verilib, Ruslan Ələkbərovun məşğulluq probleminin həll olunması Məşğulluq Mərkəzinə tövsiyə  edilib.
Rayon rəhbəri Ali Baş Komandan cənab İlham Əliyevin rəhbərliyi ilə 44 günlük Vətən müharibəsində Azərbaycanın Milli Ordusunun qazandığı qələbədən, torpaqlarımızın işğaldan azad olunmasından, dövlət səviyyəsində şəhid və qazi ailələrinə göstərilən diqqət və qayğıdan söhbət açıb, şəhidlərimizə Ulu Tanrıdan rəhmət, qazilərimzə can sağlıqı diləyib.
Hər iki şəhidin ailə üzvləri qəbuldan razı qalıblar, ölkə rəhbərinə birinci vitse-Prezidentə şəhid və qazi ailələrinə göstərilən diqqət və qayğıya görə  öz minnətdarlıqlarını bildiriblər.

---

---