Azərbaycanın İrandakı səfiri Əli Əlizadə bu ölkənin Xarici İşlər Nazirliyinə çağırılıb.

DİA.AZ bildirir ki, IRNA-nın xəbərinə əsasən, xarici işlər nazirinin köməkçisi Azərbaycan mətbuatında İran əleyhinə olan qeyri-dost bəyanatlara narazılığını və kəskin etirazını səfirə çatdırıb. "Biz bu prosesin ən qısa zamanda dayandırılmasını və təkrarlanmaması üçün lazımi tədbirlərin görülməsini gözləyirik", - XİN rəsmisi qeyd edib.

Rəsmi Tehranın bu addımı heç bir şəkildə başadüşülən deyil. Çünki illərdir efirlərində Azərbaycan əleyhində təbliğat aparan və son aylarda ölkəmizə qarşı açıq təhdidlər səsləndirən İran tərəfinin özünün etdiklərini unutduğu görünür. Əks təqdirdə, ölkəmiz haqqında əsassız ittihamlar irəli sürərək, təxribat xarakterli əməllərinə davam etməzdi. Əslində son aylar İran əsl üzünü bütün dünyaya bir daha göstərib. Hər zaman terroru maliyyələşdirən və bir çox ölkə tərəfindən terror dövləti adlandırılan İranın etdikləri heç də təəccüblü deyil. 30 il ərzində sərhədlərimizdə bir dəfə də hərbi təlim keçməyən, amma torpaqlarımızı işğaldan azad etdikdən sonra təlimlər keçməsinə başqa ad vermək olmaz. Bu, Tehrandakı molla rejiminin hansı ənənəyə söykəndiyinin əyani sübutudur. Özünü müsəlman dövləti adlandıran, amma terrorçu Ermənistanın yanında yer alan İranın Azərbaycana qarşı mövqeyi heç bir şəkildə qəbul oluna bilməz. İndiyə kimi bir dəfə belə bizə qarşı normal qonşuluq münasibətləri sərgiləməyən bu dövləti son aylar daha da azğınlaşıb. Din pərdəsi altında gizlənərək öz iyrənc əməllərini ört-basdır etməyə çalışan ölkənin maskası artıq düşmək üzrədir. Reallıq budur ki, İran adlanan dövlətin İslamla uzaqdan-yaxından heç bir əlaqəsi olmadığını bütün dünya görür.

Cənubi Azərbaycandakı soydaşlarımıza qarşı assimilyasiya siyasəti aparan molla rejimi illərdir başda tarixi Azərbaycan torpağı olan Təbriz olmaqla, güneydəki soydaşlarımızın dilinə və dininə qarşı savaş aparır.

İran adlanan dövlətin bütün çabalarına rəğmən soydaşlarımız hər zaman azərbaycanlı olduğunu böyük qürur hissi ilə hayqırır. Rəsmi Tehran unutmasın ki, İran həddini aşmağa davam etdiyi hər an Bütöv Azərbaycanın reallaşdırmasına daha da yaxınlaşırıq.

Cebhe.info-ya açıqlama verən politoloq Məhəmməd Əsədullazadə bildirib ki, İkinci Qarabağ müharibəsindən sonra İran Azərbaycana qarşı qeyri-konstruktiv və düşmənçilik siyasəti həyata keçirir:

“İran bununla bir daha müsəlman ölkəsi olmadığını əyani olaraq göstərdi. Özünü müsəlman dövləti adlandıran İran ancaq Yaxın Şərqdə terrorçu qrupları maliyyələşdirmək və terrorçu təşkilatlar yaratmaqla məşğuldur. Biz onların hətta Azərbaycanda da belə bir təşkilat yaratdıqlarını gördük. Göründüyü kimi, İran müsəlman ölkəsi olmayaraq dini məzhəb pərdəsi arxasında terrorizm və öz aqressiv ambisiyalarını yaymaqla məşğuldur.

Rəsmi Tehran İkinci Qarabağ müharibəsindən sonra Azərbaycanın yaratdığı geosiyasi nizamı özünün təhlükəsizliyi üçün ciddi təhdid hesab edir. Üstəlik, İranın ötən 30 ildə də Ermənistana qucaq açdığının şahidi olduq. Əslində İranın Azərbaycana qarşı düşmənçilik siyasət apardığını bilirdik. Onlar sadəcə olaraq bunu müəyyən dərəcədə pərdələməyə çalışırdı. Amma son dövrlərdə Azərbaycanın uğurlu hərbi əməliyyatları İranın açıq düşmənçilik siyasəti aparmasına gətirib çıxardı. Onun keçirdiyi hərbi təlimlər də birbaşa Azərbaycana qarşı təhdid idi. Əlbəttə ki, Azərbaycan bunun cavabını yüksək səviyyədə verdi”.

Politoloq vurğulayıb ki, biz artıq Cənubi Azərbaycanın müstəqilliyi uğrunda da mütləq şəkildə güneyli soydaşlarımıza dəstək olmalıyıq:

“Ümumiyyətlə, Azərbaycan artıq İrana qarşı dostluq siyasətinə son qoymalıdır. Çünki İran bizə qarşı düşmənçilik siyasəti aparır. Həmçinin, İran informasiya cəbhəsində və öz mətbuatında Azərbaycana qarşı qara kampaniyalar aparırlar. Belə olan halda, rəsmi Bakı sivil qaydada güneyli soydaşlarımızın tapdalanan hüquqlarını müdafiə edir. Bunu əlində “rəhbər” tutan İran isə Azərbaycana nota verir. Ümumiyyətlə, Azərbaycanın səfirini Xarici İşlər Nazirliyinə çağırması sadəcə olaraq riyakarlıq və ikiüzlülükdür. İranın bu addımı sadəcə olaraq, gülünc doğurur. Artıq İranda sasani-fars milliyətçiliyinin şahidi oluruq. Amma biz İranın bu siyasətini ifşa etmişik. Reallıq budur ki, İran terrorçu və terrorizmi dəstəkləyən ölkədir”.