Bu günlərdə “Azərişıq” ASC Salyan filialının rəisi Səfa Şirinov tutduğu vəzifədən azad olunub. Onun yerinə Namiq Quliyev təyin edilib. Bu təyinata qədər N.Quliyev “Azərişıq” ASC Hacıqabul filialının rəisi işləyib. Etibarlı mənbədən redaksiyamıza daxil olmuş məlumata görə, COP29 tədbirindən sonra “Azərenerji” ASC-nin paytaxt Bakıdakı strukturlarında da bəzi “illəmiş” kadrlar əvəzlənəcək.  Onlardan biri kimi iyirmi ildən çox “Azərişıq” Səhmdar Cəmiyyətinin Avtonəqliyyat İdarəsinin rəisi vəzifəsində işləmiş Səxavət Səlimov göstərilir.
Balababa Rzayev “Azərenerji” ASC-nə rəhbər vəzifəyə irəli çəkiləndə də belə-söhbətlər dolaşırdı. Həmin ərəfələr Səxavət Səlimov ona bu və ya digər sualları vermək üçün telefon açan jurnalistlərə “mən artıq işdən çıxmışam” – cavabını verirdi. Halbuki, o, daha yüksək vəzifəyə - “Azərenerji” ASC-nin Avtonəqliyyat İdarəsinin rəisi vəzifəsinə irəli çəkildi. Çoxdan göz dikdiyi kresloda yayxanan kimi əvvəl rəhbərlik etdiyi qarajda ətrafına yığdığı İsmayıllı rayonundan olan həmyerlilərini də yanına çəkdi. Onların boşalan yerlərinə yenə də İsmayıllıdan adamlar gətirdi. Xidməti maşınla təmin etdiyi sürücüsünə isə külli – ixtiyar verdi. O zalım da işçilərə necə deyərlər, qan uddurur.
Səxavət Səlimov “Azərişıq” Açıq Səhmdar Cəmiyyətinin Avtonəqliyyat İdarəsini çapıb-talamaq hesabına özünə nəhayətsiz haram kapital toplayıb. Qəribədir ki, Balababa Rzayev bütün bunları bilə-bilə Səlimova necə daha yüksək vəzifəni etibar edib. Görünür, Səlimovda Rzayevi qane edən başqa vacib məziyyətlər vardır. Yəqin, Səlimov idayə ayrılan yanacaq, sürtgü yağları, şin və başqa ehtiyat hissələrini “səmərəli və təyinatı üzrə silməkdə” pərgardır və tabe olduğu şəxslərə münasibətdə öz adına uyğun olaraq səxavətlidir.
Səxavət Səlimovun suallardan yayınmaq üçün tez-tez istifadə etdiyi bir fənd də şəkər xəstəsi olduğunu, ürəyi ağrıdığını deyib jurnalistləri özü ilə təmasdan çəkindirməsidir. Belə olan halda o, cəmi bircə suala cavab versə, yetərlidir? “Xəstəsənsə, niyə vəzifədən əl çəkmirsən?”
Səxavət Səliimov idarənin resurslarının guya az qala hamısının işğaldan azad olunmuş Qarabağa səfərbər olunmasını da tez-tez səbəb göstərərək, görmüş olduğu və görməli olduğu digər işlərin məsuliyyətindən yaxasını qırağa çəkməyə çalışır. O işlər ki, onun orta statistik Azərbaycan vətəndaşından qat-qat artıq rifahlı, hətta demək olar dəbdəbəli həyat sürməsinə şərait yaradıb, onu hədsiz var-dövlət sahibi edib. Malik olduğu nəhayətsiz kapitalı halal maaşla topladığının şübhə doğurması barədə indiyədək KİV-də çox deyilib, çox yazılıb. Səxavət bəyin haram gəlirlərinin bir mənbəyi də tender və kotirovkalarda satınalmalar haqqında qanunun tələblərinin pozulması, şəffaflığın gözlənilməməsi, korruptiv sövdələşmələrdir ki, bu da əlahiddə söhbətin mövzusudur.
Qarşı tərəfin mövqeyini tanıyırıq.
Nyus.Az