Son dövrlər mediada “Uğur 777” estetik klinikası ilə bağlı yayılan qalmaqallı xəbərlər cəmiyyətin diqqət mərkəzinə çevrilib. Klinikanın fəaliyyəti və rəhbərliyi ilə bağlı müxtəlif iddialar səsləndirilsə də, bu dəfə məsələ daha da ciddiləşib.
Heqiqixeber.az xəbər portalının redaksiyasına daxil olan məlumata görə, klinikanın rəhbəri Xəyalə xanım mediada yayımlanan tənqidi materiallardan sonra xəbər portalının baş redaktoru Məhruba Usubova ilə birbaşa əlaqə saxlayıb. Jurnalistlə aparılan bu telefon danışığında səsləndirilən bəzi ifadələr təəccüb və narahatlıq doğurub.
Portalın iddiasına görə, telefon danışığı zamanı Xəyalə xanım jurnalistin obyektivliyini etiraf etsə də, eyni zamanda dövlət qurumlarına “aylıq haqq” verdiyini bildirib. Söhbət zamanı səsləndirilən fikirlərdən belə qənaət hasil olur ki, klinika rəhbəri öz fəaliyyətinə dair nəzarəti müəyyən dərəcədə aradan qaldırmağa çalışır. Bu isə ciddi hüquqi suallar doğurur.
Qeyd edək ki, sözügedən telefon danışığı səs yazısı şəklində qeydə alınıb və mediaya təqdim edilib. Səs yazısında Xəyalə xanımın dediyi iddia edilən sözlər, nəinki jurnalist etikası, hətta cinayət qanunvericiliyi baxımından da diqqət çəkir.
“Heqiqixeber.az” rəhbərliyi bildirir ki, onlara edilən çoxsaylı zənglərə, təzyiqlərə baxmayaraq, redaksiya obyektivliyini və prinsiplərini qorumaqda davam edir: “Biz heç bir zaman mövqeyimizdən geri çəkilməmişik. Haqqın tərəfindəyik. Kimliyindən asılı olmayaraq, istənilən şəxs qanun qarşısında bərabərdir.”
Bildirir ki, səs yazısı rəsmi qurumlara təqdim olunacaq və hüquqi qiymət verilməsi üçün addımlar atılacaq.
Hazırda qarşı tərəf – “Uğur 777” estetik klinikası və rəhbərliyi məsələyə dair ictimaiyyətə hər hansı açıqlama verməyib. Buna baxmayaraq, qarşı tərəfin mövqeyini dərc etməyə hazırıq, çünki jurnalistikanın əsas prinsiplərindən biri də obyektivlik və balanslı yanaşmadır.
Davamı olacaq…

Heqiqixeber.az