Dərs ilinin sonuna doğru məktəblərdə qiymətləndirmələr və “Son zəng” mərasimləri ilə bağlı proseslər ən yüksək nöqtəsinə çatdığı bir vaxtda, Bakı şəhəri 307 nömrəli tam orta məktəbdən narahatedici iddialar səslənməkdədir. Valideynlərin və bəzi mənbələrin Heqiqxeber.az-a verdiyi məlumata görə, məktəbin direktoru Nizami Qasımzadə rəhbərlik etdiyi təhsil ocağını demək olar ki, şəxsi maraqlarına və nəzarətsizliyə təhvil verib. İddialar olduqca ciddi və təəssüf doğurucudur: məktəbdə summativ qiymətləndirmələr, tədbirlər və "Son zəng" kimi rəsmi proseslər bəhanə edilərək valideynlərdən pul yığımı həyata keçirilir.

Aldığımız məlumatlara görə, məktəbdə sinif rəhbərləri və bəzi müəllimlər dərs prosesindən daha çox, maliyyə toplanması ilə məşğuldurlar. 11-ci sinif şagirdlərindən "Son zəng" tədbiri adı altında müxtəlif məbləğlərdə pul tələb olunduğu bildirilir. Bu vəsaitin necə xərcləndiyi, şəffaflıq prinsiplərinə uyğun olub-olmadığı isə qaranlıq qalır. Bəzi valideynlər iddia edir ki, təklif olunan tədbirlərin real dəyəri yığılan məbləğlərlə uyğunlaşmır, və bu da ciddi narahatlıq yaradır.

Summativ qiymətləndirmə mərhələsində də oxşar hallar müşahidə olunur. Məlumatlara əsasən, bəzi şagirdlər valideynlərinin "göstərdiyi diqqətdən" sonra daha yüksək nəticələr əldə edə bilirlər. Bu, təhsilin keyfiyyətinə və obyektivliyinə ciddi zərbə vurur.

Valideynlərin iddiasına görə, direktor Nizami Qasımzadə son zamanlar məktəbdəki proseslərə demək olar ki, müdaxilə etmir. Onun şəxsi problemlərinə qapanması və rəhbərliyi faktiki olaraq sinif rəhbərlərinin ixtiyarına buraxması təhsil ocağının idarəçiliyində ciddi boşluqlar yaradıb. Məktəb artıq ictimai və pedaqoji qaydalardan daha çox, bazar prinsipləri ilə idarə olunur. Valideynlər sual edir: məktəbin təyinatı təhsil verməkdir, yoxsa əlavə gəlir mənbəyi yaratmaq?

Azərbaycan Respublikasının Təhsil Qanununa və müvafiq normativ sənədlərə əsasən, dövlət məktəblərində valideynlərdən və şagirdlərdən istənilən formada məcburi pul yığımı qadağandır. Bu cür halların aşkarlanması halında Təhsil Nazirliyi və müvafiq hüquq-mühafizə orqanları dərhal araşdırma aparmalı, məsul şəxslər barəsində tədbirlər görməlidir. Əgər bu cür hallar 307 nömrəli məktəbdə sistematik hal alıbsa, bu, təkcə bir məktəbin yox, bütövlükdə təhsil sisteminin etibarına zərbədir.

Heqiqxeber.az olaraq qarşı tərəfin — 307 nömrəli tam orta məktəbin direktoru Nizami Qasımzadənin, məktəb kollektivinin və Bakı Şəhəri üzrə Təhsil İdarəsinin mövqeyini dərc etməyə tam hazırıq. Əgər yuxarıda sadalanan iddialar əsassızdırsa, bu barədə aydın və əsaslandırılmış açıqlama verilməsi ictimai maraqlar baxımından vacibdir. Eyni zamanda, media olaraq təhsil sahəsində şəffaflıq, obyektivlik və ictimai nəzarətin təmin olunmasının tərəfdarıyıq.

Təhsil cəmiyyətin gələcəyini formalaşdıran ən əsas sütunlardan biridir. Valideynin məktəbə olan inamı sarsıldıqda, şagirdin motivasiyası, müəllimin nüfuzu və bütövlükdə təhsil sistemi zərbə alır. Dövlət orqanlarını, xüsusilə Təhsil Nazirliyini bu kimi hallara diqqətli yanaşmağa və konkret tədbirlər görməyə çağırırıq. 307 nömrəli məktəbdə baş verənlər əgər doğrudursa, bu, təkcə bir məktəbin yox, təhsil siyasətinin ümumi etibarlılığına kölgə salır.